Unsre Opi mit 90, faahrt no Auti konzequänt

Hört praggtisch nüt, seeht mit em guete Aug no 3 Prozänt

Er wartet duss im Auti uff uns, drum dien mir ängschtlig babbsle

Mir sinn hütt z Oobe unterwäggs mir ere Stärbe-Kabbsle

Bi unserer Klasselehrerin duet s Testestoron ebitz duuredrugge

Die het an de Bei so viel Hoor wie e Maa sunscht uff em Rugge

Sie zeigt is e Ferie-Fotteli, vo sich und ihrer Frau im Bikini

Was soll i sage! Jetzt wüsse mir, si isch die Fini

An de Gartehäg, do hange d Spinnenetz

S'isch Halloween - übersetzt - Fasnacht für EXPETS

Platzendi Hirni, Gedärm und Bluet, bringt mi nüm zum Gruuse

Aber syt ich das ESC Maskottli gsee ha, trau mi z Nacht nüm uuse 

Mues e Profi-Golfer ins Gfängnis, denn het me ihn "yyglocht"

Lieferet e Kurier an die falsch Adrässe, het er sich "verbrocht"

Steggt e Schöfer mit dr Härde im Morascht, het er sich "verschlammt"

Und Amerika het sich gottsjämmerlig "vertrumpt"

Bi unsrer Sportlehrerin, do läuft glaub öbbis krumm

Si het zwei neui Buuseimplantat, ka jetzt nur no dr Ruggeschwumm

E neui Nase, neui Zäähn, und es gseeht's e jede

Alli Lippe ufgsprützt, sie ka nümm sitze und nümm reede

Extenschens, Botox und e Überdosis Brüünigs-Greem

Nützt alles nüt, will ihr Hirni isch s Probleem

Unser Mami duet esone Abnähm-Pille schlugge

Die soll ihri 120 Kilo uff 119 aabe drugge

Im Biipackzettel stroh, scho e mänge sig dra erblindet

Was sicher hilft, will si so dr Kiehlschrangg nümi findet